挑機，不一定會贏，只要享受過程，一樣可以很興奮。
演藝學院畢業的游學修，於2015年入行，8年間常挑機，對手有電視節目中的劉鳴煒，他輸了Package；跟蕭若元論香港電影工業前途，他憑熱血贏得掌聲；還有在社交平台大戰傳媒、網民，引來如潮負評⋯⋯
面對負評，32歲的他，坦言當時自己「少年太年輕」。「以前我真係多嘢講，𠵱家我入行8年，已經少咗出聲，一來咁做好傻豬，二來我唔希望透過出Post去帶來影響，而係真係落力去做、去推動一啲嘢，唔係出Post。」
用業績說話，游學修先於2020年，有份創辦的YouTube頻道《試當真》，不足3年間已獲超過48萬訂閱人數；實體演出，還有他「挑機」演藝大師兄黃秋生，於即將公演的舞台劇《極地謎情》中，同台鬥戲。
「2017年，喺我冇嘢做嘅時候，就係因為演咗我第一個舞台劇《陪着你走》，有一個提名，對我嚟講已經係一個非常大嘅肯定。所以，舞台對我嚟講，係神聖嘅，因為我就係喺舞台，建立番我嘅自信心。
「同大師兄合作，令舞台更神聖！基本上一搵我，我就即時Say yes。」
游學修挑機的Big boss，其實是自己，成功在於克服心魔，便能轉危為機。

不忘劇本心

就如前頁所說，游學修這次於劇場的對手，是黃秋生。他笑言，第一次跟大師兄讀劇本，已感覺十分震撼。
「第一次圍讀，秋生已經背咗9成劇本，我係好驚嘅，雖然喺嗰個時間點，未需要背劇本住，但係秋生已經背到嗰個程度⋯⋯而當時我仲拍緊電影，仲未有時間背劇本，所以都有同各個單位講番。」
坦言昔日「多嘢講」，但人大了，而游學修又面對大師兄，所以：「會乖乖哋聽話，而秋生都當我係一張白紙，由零開始咁教我，同我分享對劇本嘅睇法，又會分析角色嘅動機，仲有講對白嘅技巧，同埋演翻譯劇本嘅方法，即係塞錢入我袋。」
說到跟大師兄的緣份，游學修表示，全因膽粗粗。「我喺2018年，自己搞咗套劇集《仇老爺爺》，做埋編劇、導演、監製，請咗秋生客串一個角色，今次同佢做埋舞台劇，係一個里程碑。」
以演員身份入行，其實編劇才是游學修的本業，他於演藝學院，就是主修編劇。「𠵱家我籌備緊第一部電影，自己寫劇本。喺我嘅創作，都係有幽默嘅元素，我覺得笑中有淚，喺觀眾毫無預備之下，留嘅眼淚係最有Impact嘅，《仇老爺爺》都係咁。」

樣樣一腳踢

製作劇集身兼數職，近三年游學修搞得有聲有色的YouTube頻道，也是一腳踢。
「因為我同兩個Partner蘇豪（蘇致豪）、許賢，都未開過公司，唔知一間公司嘅運作係點，《試當真》開始到去年，好多嘢都係冇建構，一味衝，只係聽一個人嘅指令，就係我，所以可以話係災難級！
「喺我嘅Mindset入面，係所有嘢都關我事，就算一個Project，好與壞都係關公司事，即係關我事。」
訪問這天是星期日，但游學修於早上已在辦公室，受訪過後也要返回公司，但他稱，全情投入的，不止他一人，「拍緊喺拍緊嘢嘅時候，都暈低過兩次！」
問他作為一個藝術家，還有甚麼目標，他聞「藝術家」一詞後，笑得特別燦爛，但口中卻說：「如果游學修覺得自己係一個藝術家，又俾人鬧㗎嘞！我都俾人鬧得多⋯⋯」
其後旋即表示：「我少諗咗個人層面嘅嘢，我可以演戲、創作，可以享受嘅嘢，我都享受緊。講Achievement嘅話，我會諗《試當真》呢嚿嘢可以achieve啲咩。
「𠵱家我哋嘅創作，都係局限喺網上平台，就算係多啲人識嘅成員，好似家忻（Kayan9896），佢喺影視上嘅作品都係少，我希望可以打破呢個局面。」

負評反應器

營運YouTube頻道，少不免要回到原點：面對負評。
「我理（負評）㗎！我諗我係圈中少有會理嘅人，其他人未必信，但我自問有一個優點，就係常檢討，睇完我會檢討自己，有陣時真係會諗，我係一個唔討好嘅所謂藝人。
「除咗我以前多嘢講，雖然我覺得一啲事唔公平，於是出咗聲，但出聲之後，人哋會覺得：『你憑咩呀？幾時到你出聲呀？』。
「又可能我個樣唔係咁討好，再Keep住做一啲人哋唔做嘅嘢，會俾人覺得標奇立異，可以好乞人憎。」
網民之間，游學修還有「新一代女神收割機」的稱號，他坦言自己「個格乞人憎」，令人認為他「溝好多女」。「入行到𠵱家，我只係拍過3次拖，一啲都唔過分。」
而3段戀情的女主角，分別是「過去式」蘇麗珊及曾樂彤，還有「現在式」陳苡臻。
「以前唔知咩叫拍拖，一段關係就係點樣相處同了解。我就嚟33歲，都希望快啲成家立室。」

Work-life balance

不論打工仔或老細，誰不想Work-life balance？
游學修也不例外，想於工作與生活之間，取得平衡。當然，你知我知，現實邊有咁理想。
「雖然𠵱家我學識咗，點樣將《試當真》嘅工作，有效地去俾唔同嘅人，但細心咁諗，我都好唔Balance，冇乜私人時間。
「喺開始頭一年，我係Enjoy嗰一種填滿嘅，工作填滿生活，但𠵱家係超越咗嗰種填滿，Work-life balance，我係因為做唔到，所以成日要講住，當係一種提醒。」
游學修笑言，未能平衡工作與生活，令他連拍拖的時間也沒有。「所以我可以再Balance啲，哈哈！」
知易行難，你也不妨想想，如何在失衡中找回平衡吧。